Molo adong angka Dongan Tubu,Boru & Bere Pomparan Ni OPPU ULUBALANG TAPPAK,Turunan Ni DATU MANGAMBE

SITAPEAN

SITAPEAN
PEA NABOLAK

MARSIURUPAN

SELLATRAVEL,mamfasilitasi rencana perjalanan anda:
*Paket tour Dalam & Luar negeri
*Tiket Pesawat,Domestik & Internasional
*Reservasi Hotel
*Pengurusan Visa
*Cargo Udara
Silahkan Menghubungi kami setiap hari senin - Sabtu jam 08.00 wib - 22.00 wib di:
Telp : 02187780705
Hp : 081310620726
Email: silabandapot@ymail.com
On line:massengger:silabandapot@ymail.com

Senin, 18 April 2011

TOGA MANULLANG


Senin 18 April 2011

SURAT PERNYATAAN TARINGOT TUPARTORDING NI PARTUBU NI ANAKNI “SITOGA SIMANULLANG”
NAHINATINDANGKON NI PANGITUA - PANGITUA NATINGGAL DIBONA PASOGIT BAKKARA
23 Mei 1963

SITOGA SIMANULLANG : Tunggani boruna 2 (dua) ima :
1. Boru Pasaribu
2. Boru Nainggolan

ANAKNA : 3 (Tolu) ima :
1. Tuan Delimang
2. Op.Raja Panguhalan ( Pamuharaja )
3. Datu Napasang

Opputta boru Pasaribu :

Jumolo dioli oppunta sitoga Simanullang, alai opputta boru Pasaribu leleng asa tumubuhon anak jadi laoma opputta Sitoga Simanullang dohot opputta boru Pasaribu marsibaso datu (mangulpuhi tu datu) jadi roma pandok ni datui *ingkon dua dotunggani borum asa gabe ho* ninna tu opputta Sitoga Simanullang jala dibege opputta boru Pasaribu. Jadi roma opputta boru Pasaribu dijujuima opputta sitoga Simanullang asa mangoli muse, alai laos opputta boru Pasaribu ma mamili imbangna, jala didokma tu opputta Sitoga Simanullang boru Nainggolan onma buat, jadi dioloi opputta Sitoga Simanullang ma diolima boru Nainggolan, dung saut dioli opputta Sitoga Simanullang opputta boru Nainggolan marpati-patianma opputta boru nadua (marjanji) dijolo ni opputta Sitoga Simanullang, ia isini pati-patiani (janji) nasidai songnonma : *Manang ise hita jumolo tumubuhon anak,ba anaknima Siahaan* songonima isini pati-patian (janji) nasida omputta boru nadua on, marsiunduk masi oloan ma nasida.

Opputta boru Nainggolan :

Omputta boru Nainggolan maringanan mai dibagas martarup *RI* dapotma tingkina jala gokma do taonna, gabe-gameanma opputta boru Nainggolan, ia pae sorangna opputta mulajadi nabolon ido manontuhon sa, jala tutuma sorang sada dakdanak bawa, sian opputta boru Nainggolan on, dijabu nani inganannai namartarup *RI* dibahenma goarni anaknai *TUAN DELIMANG* jala laos goar tulusna haojahan ni jabu na martarup *RI* ima gabe margoar *LUMBAN RI*

Opputta boru Pasaribu :

Ia opputta boru Pasaribu naparjolo diolion, dung sorang anak ni opputta baru Nainggolan ima Tuan Delimang, gabe-gabean ma opputta boru Pasaribu,jala pai sorangna tongma opputta mulajadi naboloni namanontuhonsa jala tutu sorangma sada dakdanak bawa, diopputta boru Pasaribu on, dibahenma goarna :
*OMPU RAJA PANGUHALAN* Ia oputta boru Pasaribu on maringanan dijabu namartarup ijuk do jala tungkup bungkulanna jala laos goar tulus ma tong-tong haojahan ni jabui, gabe margoar *LUMBAN NAUNGKUP*

Opputa baru Nainggolan :

Dung tubu oputta Ompu Raja Panguhalan sian opputta boru Pasaribu, gabe-gabean ma muse opputta boru Naninggolan jala sorang mamuse sada dakdanak bawa dibahenma goarna *DATU NAPASANG* jala tongdo dijabu
namartarup *RI* opputta Datu Napasang on tubu, songnima partording ni partubu nia anak ni Opputta Sitoga Simanullang.

“SEJARAH NALAHO MANGULAHI TAROMBO TU BAKKARA”

BONSIRNA :

Tanggal 18 Mei 1963, pamuli boru do dongan tubutta ima St. BILHEM Simanullang, pomparan ni Tuan Delimang dipercut jala terjadima disi parsalisihan dijambar Panganon Juhut dijouhon si Syarif Simanullang Tuan Delimang ma jambar panganon tu Anggi doli Pamuharaja, songononma panjouhononna : “Onma Panganon Juhut tu anggi doli dipomparan ni daompung lumban naungkup“ mamittor dialusi si IMANUEL SIMANULLANG PAMUHARAJA IJOLMA, ulahi jolo *Hutando do namula ulaon on* dongan tubu ma jouhon asa hujalo hami, songonima pandokna, nioloan dijolo pangidoan on ala nunga peak – peak pinggan panganon “Jambar Juhut / Upa Suhut“ dijambar juhut upa suhuti, laos nijouhon ma muse jambar ni anggi doli Lumban Naungkup, alai peak – peak ma jambar juhuti dijoloni anggi doli Lumban Naungkup, jala pinadalanma jambar juhuti muse tunahombar tu ulaoni, dung sidung dibagihon jambar juhuti, roma tolahan (dipaulak) si IMANUEL SIMANULLANG mamuse jambar juhuti, jala di dokma muse hatana “ Hutanda hami do namarulaon on “ Dungi marsoalma pomparan ni opputta Sitoga Simanullangi ima pomparan ni Tuang Delimang (Parlumba Ri) dohot pomparan ni Pamuha Raja Raja Ijolma (Parlumban Naungkup) ala nunga bertentangan pandapot antara ni pomparan ni Tuan Delimang dohot Pomparan ni Raja Ijolma tingkii indang adong dapot sada pangattusion be dipartubu ni opputta si Toga Simanullang, jala pola do satonga jom lelengna, jadi roma tola ni raja tu pomparan ni opputta Tuan Delimang (Hasuhuton Parboru) ma mandok, songonon majolo amang. (Situbuhon Boru) jambar juhuti, jouhon hamu mai jolo jambar ni dongan tubu. Jala hamupe tutu pomparan ni opputta Tuan delimang,mangoloi ma ditolo nabinahen ni angka amanta Raja, alai hingot hami do umpama ni opputta sijolo – jolo tubu namandok :

“Mangkuling Gaja, dirura pangaloan
molo martola Raja roama molo so nioloan
molo ni oloan dapotan pangomoan
molo sonioloan dapotan hamagoan “

Sautma tutu ni kouhon jambar juhuti, songon nidokni angka amanta Raja, Jambar ni dongan tubu, jala dijalo pomparan ni Pamuharaja Raja ijolma ma (Imanuel Simanullang) jambar juhuti, ipe asa minulaan muse sihataan hombar tu pangalahoni siulaon Pamasu masuon / Pangadation nii borui sahat tunamarbagi olop – olop. Dung sidung pesta pangadation ni borui dipercut, roma botarinaii manang napiga pangituai sian Pomparan ni opputta Tuan Delimang (Sitoga Simanullang) tujabu ni amanta MATHIAS SIMANULLANG (Monding diari Jumat tanggal 20 mei 2005, sekira pukul 11.30 Wib) di jalan sena Perumahan CPM Medan, lao paboahon namasa dipesta pangadation ni boruni dongan tubutta St, BILHEM SIMANULLANG na dipercuti, naung sotarbotobe partordingni partubu ni anak ni opputta Sitoga Simanullang diangka pinomparna, ala toho ditingkii amanta MATHIAS SIMANULLANG indang boi dohot tu pestai alani tugas. Dung dibege amanta MATHIAS SIMANULLANG hatorangan naong gabe songoni tarjadi dipesta Pangadation ni boruttai dipercut, Mandok hatama amanta MATHIAS SIMANULLANGi, mauleate madihamu angka dongan tubu, ala dipasangap hamu do ahu, jala rohamu tu jabuttaon lao paboahon namasa dihita dipestantai, ipe sidohonongku tuhamu dongan tubu ondo, tangkas do diboto hamu ia ahu hurang tangkas do huboto dipartording ni partubu ni anak ni opputta Sitoga Simanullangi, alai hoinon ma dohonongku tuhamu angka dongan tubukku adong do huingot apala sada umpama nii opputta naparjolo namandok “Molo litok aek ditoruan, tingkir mai tujulu“ jadi nunga litok nuaeng dihita partubu ni anakni opputta Sitoga Simanullang, ianggo narohakku tapatangkas ma tu Bona ni turetta (Bona Pasogit) ala ingkon disido sibahen nature. Dung dibege hatasian amanta MATHIAS SIMANULLANGi, maniunduk masioloan ma Pangituai – pangituai ni Pomparan Sitoga Simanullangi, jala martahi ma muse asa binahen rapot / parpunguan muse dijabu on ari 19 Mei 1963 jala sude do sejutu, tanggal 19 s/d 24 Mei 1963, martahi ma Paingitu – Pangituai sian Pomparan ni opputta Sitoga Simanullang, laos dijabu ni amanta MATHIAS SIMANULLANG jl. Sena Perumahan CPM, jala dapot matutu sahata saoloan ma pangitua – pangitua namarpungui lao mambahen utusan tu Bona ni Pasogit Bakkara, lao patangkashon (Mangulahi Tarombo) asa unang adong nagabe sala pangantusion dihita Pomparan ni opputta Sitoga Simanullang tarlobi – lobi hita natinggal di pangarattoan(Medan on) Jala natarsurat ditoru onma angka goar – goar ni amanta namangutus utusan nalao tu Bona Pasogit (Bakkara) jala natarsurat ditoruon ma muse goar – goar ni angka amanta naniutus tu Bona Pasogit (Bakkara) ima :

*GOAR – GOAR NI NAMANGUTUS*

1. ISKANDAR SIMANULLANG ( Parlumban naungkup )
2. SALMON SIMANULLANG ( sda )
3. ST.MANAEK SIMANULLANG ( Parlumban Ri )
4. UBA SIMANULLANG ( sda )
5. DANIEL SIMANULLANG ( sda )
6. REGEN SIMANULLANG ( sda )
7. LUDIN SIMANULLANG ( sda )
8. OBERLIN SIMANULLANG ( sda )
9. SYARIF SIMANULLANG ( sda )
10. OGAMO SIMANULLANG ( sda )
11. THEOPLUS SIMANULLANG ( Parlumban Naungkup )
12. JASON SIMANULLANG ( Parlumban Ri )
13. MATHIAS SIMANULLANG ( sda )
14. ST. P. SIMANULLANG ( sda )
15. MAKRIPAT SIMANULLANG ( sda )

*GOAR – GOAR NI NANIUTUS TUBONA PASOGIT BAKKARA*

1. SYARIF SIMANULLANG ( Parlumban Ri )
2. ST. ARSENIUS SIMANULLANG( sda )
3. ST. P. SIMANULLANG ( sda )
4, MAKRIPAT SIMANULLANG ( sda )
5. T. BACHTIAR SIMANULLANG ( sda )
6. R. HASIHOLAN Br SIMANULLANG

Jala rapma angka amanta na 15 (sampulu lima) halahon ma, manglehon bantuan alas ni naboi gogonabe asa adong tu biaya dohot parongkosan didalan lao mangalului tarombo tubona Pasogit di Bakkara. Borhatma naniutusi tubona pasogit Bakkara ari : 25 Mei 1963 pukul 06.30 jala mamboan surat sian pangitua –pangituai na 15 halaki tu angka amanta pangitua – pangituai sidapothonon ni naniutusi tu bona ni ture di Bakkara, ima suratna mar ari, 23 Mei 1963 jala ditanda tangani manang napiga sian antara ni pangitua namangutusi, songonon ma isi ni suratna niboan nii nadiutusi tu Bakkara :

TUMOPOTHON : *NAPINARSANGAPAN AMA NAMI PINOMPARNI SITOGA SIMANULLANG NAMIAN DIBAKKARA*

Dohot hormat,
Hami angka dakdanak muna natinggal dipangrattoan / medan dohot nahumaliangna, rotuadopan ni hamu angka ama mangido dohot manangkasi huhut mangalu – alu songoan natarsurat ditoru on :

1. Sian ias dohot sadani rohanami,mangido tuhamu angka amanami, napatotahon
partubuta, napiga do nasatutuna pinompar ni sitoga Simanullang.

2. Nadi ari 18 Mei 1963 naung salpui tarjadima parsoalan sian nasa pihak tu
nasa pihak nai tentang menentang diruhut – ruhut ni antara sihahaan dohot
sianggian antara hita sama hita.

3. Namardomu tusi hu utus hami do nalobi tangkas dope patoranghon siala
namasai tarjadi sian antara hita sama hita ima :

1. SYARIF SIMANULLANG
2. ST.ARSENIUS SIMANULLANG
3. ST. B, SIMANULLANG
4. MAKRIPAT SIMANULLANG

Jadi dibagasannai, pos situtu doroha nami tu hamu amanami nahinormatan,mamboan hadengganonta di Pomparan ni Sitoga Simanullang nahu utus hamion disude hita pomparan ni Sitoga Simanullang umumna.
Medan, 23 Mei 1963

Sahatma tabenami tuhamu sude amanami nahuhormati hami, hami namandatangani :

1. ttd MATHIAS SIMANULLANG, Jln. Sena Medan
2. ttd ISKANDAR SIMANULLANG, Jln. Sindoro Medan
3. ttd UGAMO SIMANULLANG, Jln sidorame Medan


*CATATAN PARDALANAN NI NANIUTUS TO BONA PASOGIT BAKKARA*

Hira – hira 300 – 400 meter nari sian tao tu Bakkara, golap matutu hubereng hami rura Bakkarai, hape nadilakkopi ombun do, dung hira-hira 150 meter nai sian tao Bakkara torang ma jala mago ma ombuni sihar matutu sahat tunamandegehon simanjojak nami, nadiutusi ditopini tao bonani turettai, sahat tujabuni amanta ST. ALBINUS SIMANULLANG (Lumban Naungkup) dihuta bangunan Bakkara hira-hira jam 19.00 Wib borngini laos disima hami marlompan dohot minum aek sitio-tio nang panokkon simalolong nami nadiutusi.

KEADAAN MANOGOTNA ARI MINGGU, 26 MEI 1963 jam 06.30 wib di BAKKARA

Lao hami maridi tu Pancur golang-golang, sipancang holi-holi sipaimbur anak maggodang, mulak hami sian namaridii, manghatai mahami dohot Ompung Lobang Manullang (lumban Naungkup) sada pangituai di Bakkarai, jala mulaii mahami padalanhon tugas nami nadiutusi, martaringot mahami dohot amanta ompung lobang on, songononma mulanai panghataion nami : Sungkun-sungkun nami nadiutusi, “Piga do satutuna anakni omputta Sitoga Simanullang“ Alus ni amanta on “Tolu“ songon diama ale amang hatorangannai natolui.. jala behama turi-turianna.? Dung songoni amanta ompu Lobang onpe, laos sungkun-sungkun ma tu nadiutusi namandok : “Simanullang dia ma nang hamu ale amang. Alus nami botoon ni damang doi muse, dung dapot hami nahulului hami on, dung songoni amanta ompu lobang ipe tarsongon namanghohom ma, dung songoni alus nami alai saini resek-resek ma muse, alai songon namaolma otik hatorangan nai, dung songoni mardomu giring-giring pe nunga jou-jou tuangka nanaeng lao tuparmingguan, jala hami petutu marsadiama nanaeng mulak tujabu ni amanta St.Albiner Simanullangi, jala nadiutusi pe marniatdo nanaeng lao tu parmingguan, hira-hira jam 09.00 manogot. Ale hami nadiutus, dung haruar sian parmingguan, nunga martahi hami naingkon lao do tuhuta simangulappe, tumopothon angka amanta pangituai na adong dihuta simangulappei, dung haruar sian parmingguan hami nadiutus lao ma hami marudur-udur, toho sada kode kopi pajumpang mahami dohot amanta kampung Lincius Simanullang (Datu Napasang) laos binahenma pangidoan tu amanta on, molo tung boi nian asa boi nian manang napiga pangituai, naboi mangalehon pandapot dipartordingni partubu ni anak ni omputta Sitoga Simanullangi, na adong dihuta simangulappe jadi sautma tutu dipanpungu amanta hampung Lincius Simanullang, pangitua-pangitua laos udurma hami tujabuni amanta Kampung Lancius Simanullangi.
Dung pungu hami tutu dijabu ni amantaon, lobi hurang 15 halak, pinukka ma manukkun : “Amang dohot hamu aka napinor sangapan umbahen narope hami tubona ni turetta on, nanaeng manungkun hamu angka natu-tua nami do jala, naniutus ni dongan tubumuna do hami nasian pangarattoan. “Piga do Nasatu-tuna anakni omputta Sitoga Simanullang.? Adong do manang napiga minit asa adong namangalusi tung maol situtudo tahe dialusi natoropi, jadi marsoarama amanta kampung Lencius Simanullangi mandok : 2 (dua) do anakni Sitoga Simanullang jala alus nami Mauleate !!! songon dia do ale amang turi-turian na ni anakna na dua on.? Jala ise do goar-goar nadua on dung songoni sungkun-sungkun nami, roma amanta kampung Lencius Simanullang mandok : sada mai Lumban Ri. Paduahon ima lumban naungkup. Tong-tong do pinangido bukti-bukti, alai ndang adong boi dilehon hatorangan na sajelas-jelasna, dungi sai pinatangkas matutu amanta natoropi, jadi mangalehon pandapotma tutu amanta Kampung Paijan Manullang (Lumban Naungkup) namandok : 3 (tolu) do anak ni Omputta Sitoga Simanullang ima :

1. Tuan Delimang
2. Pamuharaja
3. Datu Napasang

Alus nami nadiutusi, Mauleate.!!! Laos pinangidoma bukti-bukti dohot kenyataan-kenyataan na, tong-tong do ragu-ragu patoranghon, sai masiberengan ma natoropi, laos soadongbe namangalehon pandapotna, ujungna sai manghohombema sasudena, jadi ala ninaso adongibe mangalehon hatorangan tuhami nadiutusi, jadi marumpama ma hami : “Litok aek dijaean, tikkiron ma juluan (Bonana) andorabionma naso olo Panaguhan (Pasusuhon) jala Guamonma naso olo managuk(Manusu)” Dung martonggoma (mangido) mahami nadiutusi asa dipatuduhon dalan hatorangan di pomparan ni Omputta Sitoga Simanullangi, unang adong nian ambat nasa obuk, halang nasadahanon dipomparanna, jadi tumpuma ale amang situan natoropi manindang randorungon si Syarif Manullang (Tuan Delimang) huhut mangangguk jala huhutma maraburan ilu-ilu sian simalolong, laos mangihutma muse manetekhon iluna amanta St. B. Manullang (Tuan Delimang) jala ihutma muse manetekhon iluna amanta St. AR. Simanullang (Lumban Naungkup) Pamuharaja, jadi digohi anggukna ma jabu ni amanta Kampung Lencius Manullang (Datu Napasang) i, jala manghohom ma sude natoropi. Harupe songni tarjadi tong-tong do di ingani roha natorang pikkiran dihami nadiutusi, binahen do pangidoan tuangka pangitua napungui, ai tung boi nian asa marusaha (Berictiar) nanaeng papunguhon pangitua-pangitua na adong dibona turetta on, dapotma tutu sada ni panghataion, alai roma muse sungkun-sungkun ni angka Pangitua-pangituai tuhami nadiutusi songonnonma : Ise mahita papunguhon angka pangitua-pangituai,,??? Alus nami mardos niroha ma hita, jadi diputushonma pakkataion, nainghon hami nadiutusi ma nalao papunguhon angka natua-tua na adong dibona niturettai, alai laos hubahen hami ma janji molo dung,dapot hupapungu hami pangitua-pangitua (angka Natua-tua) suruan namipe manggokhon hamu angka natua-tua sian huta Simangulappe on, jadi marhehe tunauli be mahami napungui (bubar) tutu nian disauti dohami dijabu ni amanta Kampung Lencius Simanullangi, asa disi hami mangan indahan nalas, alus nami Mauleate.!!! Ma mardomu atik tung boi dope papunguon nami angka amanta natua-tua na adong dibona ni turetta. Hamipe borhatma manuju huta bangunan tujabu ni amanta St.Albinus Simanullang, sahat ma hami tutu hira-hira jam 17.30 botarina, nang inanta soripada nalambok malilui, nunga hape diparade sipanganon dohot siinumon dihami angka utusan pomparan ni omputta Sitoga Simanullangi jadi mangan ma hami tutu. Ale angka amang situan natorop, ianggo ate-ate dohot pusu-pusu nunga tung magete mamingkiri tugas nami, hami nadiutus ni dongan tubu nasian medan, ala soadong dope hasilna natarida nahulului hami, jala roma turoha songon andungni santum ni pisang “Tuginjang sosahat,tutoru pe sosahat“ (Dieahi) ima ale angka amang naro tubagasan roha, ala ni naso adong pangarimpunan sian angka natua-tua nanidapothon jala nungan putus tahi nami naingkon mardalan manogot sian bona ni turettai, songon nidok ni umpama : “Ranggas nagantung, didangka ni simartoli, ndang aha nasodung ditaon jolma nangolo” roma alusni amanta St. Albinus on, mamuhai rohanami jala dibuhai omputta Pamuharaja anakni omputta Sitoga Simanullangi ma, namandok songonon : au tu amanta Datu (tukang bosi) anma hita jalo mangkatai ale aka amang !!! ninna St Albinus Simanullang onma alus nami Mauleate !!! jadi tutu lao mahami tujabu ni amanta datu (tukang bosi)i alai laos sinuru ma suruan nalao paboahon tu huta simangulappe natua-tua nasaboipapungu on namibe angka pangitua-pangitua, jala hamipe borhatma tujabuni amanta datui, dung sahat hami tujabu ni amanta datu on, laos pinasahat ma surat ni dongan tubu namangutus hami nasian medani, laos pinaboa ma kejadian nadihuta simangulappei, tu amanta datui, jadii mulaima hami manghatai hira-hira jam 20.30 borngin. Nimula an ma manungkun amanta Datui :

1. Sungkun-sungkun ni hami nadiutusi : Amang !!! piga do nasatutuna
anakni omputta Sitoga Simanullangi : alus ni amanta Datu (tukang
Bosi)i 3 (tolu)

2. Sungkun-sungkun nami muse tu amanta datu (tukang bosi)I songon
diama ale amang hatorangan na dohot bukti-bukti na.??? jala isema
goar-goar ni natolui.??? Alus ni amanta datui :

1. Tuan Delimang (Parlumban RI)
2. Op.Raja Panguhalan Glr Pamuharaja (parlumban
Naungkup)
3. Datu Napasang (Parlumban Ri)

namardomu tusi adong do tohonan dilehon raja nasangapi ima raja Sisingamangaraja ima LAGE OMAS, alai hatopan doi dihita sude pomparan ni omputta Sitoga Simanullang, jala sihahaan ma umpe-umpe (Manimpan) ima Tuan Delimang, jala adong dope tambani i, sibuhai somba, hatorangan ni sibuhai somba on, songononmai : “ia nanaeng mamele dohot namardomu tusi, naingkon omputta Op.Raja Panguhalan do mamukkai, ipe asa dihatahon Rajai Raja Sisingamangaraja, ima asa gabe goar ni omputta Op.Raja Panguhalan margoar : Pamuharaja (Goar Tohonan)

Bukti – bukti

Sionom ompu na adong di rura Bakkara on, adong do bukti-buktina, nasoboi diose pomparan ni si onom ompu, jala natinotophon ni omputta Siraja Oloan doi : songnon ma pangalahona :

“Susunan ni sionom ompui, natinotophon ni omputta si Raja Oloan ima :

1. Bakkara 3 (tolu) Panggoarina
2. Sinambela 3 (tolu) Panggoarina
3. Sihite 3 (tolu) Panggoarina
4. Simanullang 3 (tolu) Panggoarina
5. Marbun 3 (tolu) Panggoarina
6. Simamora 3 (tolu) Panggoarina

Ia natolu-tolu panggoarina on, sihahaan ma namarjanji tu sihahaan jala dipaidua ma marjanji tu sipaidua, jala sipaitolu ma marjanji tu sipaitolu : Apala onma mambuktihon :

I. Panggoari ni anak sihahaan :

1. Bakkara Uruk
2. Sinambela Raja pareme
3. Sihite Panderaja
4. Simanullang Tuan Delimang
5. Marbun Lumban Batu
6. Simamora Purba

II. Panggoari ni anak sipaidua :

1. Bakkara tonga-tonga
2. Sinambela Tuan Nabolas
3. Sihite sigur tohuk
4. Simanullang Pamuharaja
5. Marbun Banjarnahor
6. Simamora Manalu

III. Panggoari ni anak paitolu :

1. Bakkara Toruan
2. Sinambela Ompu.Raja dionan (Sisingamangaraja)
3. Sihite Siguru Leang
4. Simanullang Datu Napasang
5. Marbun Lumban Gaol
6. Simamora Debataraja

*** Ompu Raja ijolma manaong siala gundi
Napinukka ni jolma naparjolo
Si ihuthonon ni jolma naparpudi

**** Maringan ma siborok, digulu-guluan ni horbo marjaga ma
namalo, marguruma naso umboto

*** Dengke Sibuluan, tutonggina tu tabona
Manang ise si ose padan, turipurna tumagona

Bukti-bukti onma ale dongan tubu, namanghatindakhon ro disadari on na pinaihut-ihut ni si Onom ompu di rura Bakkara on, singoni ma hatorangan ni amanta Datu (Tukang Bosi)i.

Alus nami : mauleate ma ale amang dihatorangan nani lehon ni damangi, jala peng-peng ma damang matua, jala tu amanta datu ondo pinasahat surat nabinoan ni nadiutusi, ima pangitua-pangitua na sampulu lima halak nasian medani. Jala roma muse hata namansai gomos sian amanta datu (tukang Bosi) i namandok dongonon :

“hamu dongan tubu nami alus ni natua-tua nasian medan, manogot ari 27 Mei 1963 ahu namajolo napapunguhon dongan pangitua na adong di bonani turetta on, asa unang adong be keragu-raguan dihamu dongan tubu nasian pangarattoan i, jala naingkon dijabutta ondo hita marsogot mangan indahan nalas dohot minum aek sitio-tio, patio parlabaan nang patiurhon parsaulian dihita on sudena pomparan ni Omputta Sitoga Simanullang” songonima pandok ni amantta datu (tukang Bosi) i, panuturi nalambok malilui, alus nami “mauliate” Jam 24.00 Wib (12.00) borngin hamipe mulak tujabu ni amanta St. Albinus Simanullang di huta bangunan, hinorhonni balga ni roha nami naniutusi, nabinuhai ni amanta St. Albinus Simanullangi, hape golap bulan ditikkii, torangma dipamerengan ni roha nami batu namargapa gopi ipe,lamot nama pakkilalaon ni degehon, jala tung so ni ingot be namasa si Mangulappe i, hinorhon ni hatorangan dohot bukti-bukti napina torang ni amanta datu (tukang bosi) i, di huta siandani, jala tung sobinoto da naung sahat do hape hami tu huta bangunan, ala naso tarlilis balga ni jasa-jasa ni amanta datu on, si datu namarsak roha jala sipahiras pangalangka dohot si paulak hosa loja dihami naniutusi, disude tahe pomparan ni opputta si Toga Simanullangi :

* HARIARA MASUNDUNG – MASUNDUNG TU BONANA
MARSANGAP MARTUAMA AMANTA DATUI SONGONI NANG PINAMPARNA

* SITUMBUR PAHOMPUNA – TAMBAAN NI GOARNA
SIMBUR MAI MAGODANG – TUMPAHON NI TUHAN TA MULAJADI NABOLONI

* SITUMBUR MA HAPE – TAMBAAN NI GOARNA TUBALIAN UNANG MAHUA – DIHUTA
PE UNANG MAR MARA

Jam 24.30 Wib borngin sahatma hami tu huta Bangunan jabu ni amanta St. Albinus Simanullangi, jala jala mulai ma hami mang elek – elek simalolong (modom) jala pintor derem ma hami tutu. Dung adong hira-hira 30 menit dung derem SYARIF SIMANULLANG (TD) mangangguk di huta simangulappei, marnipi ma ibana, pittor di ida ma ro tolu halak dos nang balgana dohot pakkeanna, jala sarupa bulang-bulang na, dos nang ginjangna, ro mandapothon au (Syarif Simanullang) alai tung saotik ndang adong hata sipeoponhu sian naroi, au pe ngotma jala lulu-lulu ma simalolonghu hape namarnipi do ahu ditikkii. Huroha tarbege do tu partondion dohot tu sahala ni opputta, anak ni opputta Sitoga Simanullangi, jala di ida do haroha jala dibege-bege angguk dohot ilu-ilu namauas disada ni roha diangka pinomparna, ima huroha umbahen nadipataridahon dirina dibagasan parnipion di pomparanna, jala tung so dihalomohon tondina do huroha adong “Mula ni singka mabar-bar, bonsir ni padang matutung” disude hitaon pinompar na, ala mardomu na adong do pertentangan ni partubu di pangarattoan di pomparan na, ido umbahen na diutus angka Pangitua-pangitua hami tu bona ni Pasogit (boni turetta) songon na didok ni Umpana :

* Ompu Raja ijolo – Marsaonghon siala gundi – Napinungka ni Jolma na
perjolo – Si ihuttonon ni jolma na parpudi

* Adorabion ma naso olo panaguhan – Jala guamon ma naso olo managuk

* Molo litok aek di jae an – tikkiron ma tu bona na

Mersogot na, ari 27 Mei 1963

Jadi matutu di jabu ni amanta datu (tukang bosi) on ma hami marpungu huhut marlompan dohot minum aek sitio-tio, dung sidung hami mangan dohot minum, marhata sigabe-bage ma hami, laos tong do dipatakkas amanta datu (tukang bosi) ido, bodar rapma hita dohot angka pangitua-pangitua pasadahon nasa pandapot na be, hombar tu partording ni pomparan ni omputta Sitoga Simanullang i, alus nami “Mauleate” dung sidung na marhata digabe-gabe i, manurdukhon demban ma inanta soripada nauli lagu i, hamipe tutu nani utusi mardemban ma (marnapuran)

* Demban ni demban – demban ni boru sagala – martuama namangalehon –
songoni nang nani demban na

* Napuran simaropat ni hiong – nani lehon ni inanta soripada –
tubalian mangalap tua – di huta manjalo laba

* Tuktu ninna anduhur – jala tioma ninna lote – sai sahatma
pangidoantai – unang muba unang mose

Merhehe tu nauli be mahami, hami na niutus ipe lao ma hami manuju tu Tugu ni Omputta SIRAJA OLOAN lao marziarah laos sian jabu ni amanta datu (tukang bosi) on do hami borhat nalaho ziarah i, tu tugu ni Omputta Siraja Oloan. Dung sahat hami tu tugu ni Omputta Siraja Oloan i, hupaias hami ma duhut-duhut dohot angka rambang-rambang na adong ditugu i, dung sidungi tampak ma hami naniutusi jala manutung haminjon, jala mangido (martonggo) ma hami tu Omputta Mulajadi Naboloni, nang tusahala ni Omputta Siraja Oloan, asa adong nian dihita on napinomparna songong sahala ni Omputta Raja Sisingamangaraja, Parmahan dibalian Pangulu di Huta. Dung sidung siang tugu ni Omputta Siraja Oloan i, laos lao mahami tong-tong mangido tu sahala ni Rajat ta Raja Sisingamangaraja tu batu siukkap-ukapon, disipe tong-tong do hami mangido asa adong nian dihita pinompar na on sada ni roha manimbung tu ginjang mangangkat rap tu holbung di hita sudena pomparan ni omputta Siraja Oloan dung sidung hami namar ziarah sian nadua bagiani, pintor ditogu inanta soripada ma hami muse tu jabuna ima Paniaran ni omputta nahinnan Amani Pulobatu (boru regar) di lumban rajai, jala disi mahami naniutusi minum aek situo-tio. Jala manjalo surduhon demban sian inanta nalambok malilui, sidungi marhehe nauli mahami manuju huta bangunan, Hape adong ma boru ni Sitoga Simanullang naung marniat, dung diida hami marudur-udur nalaho ziarahi, ingkon ambattonna hami dung mulak na ziarah i, disi dung mulak hami tutu sian na ziarahi ditogu ni boru Sitoga Simanullang on (Simamora) marga nasida, tujabu nasida tu huta si Onggang. Tutu dung sahat hami tu jabu nunga hembang lage tiar dohot peak pinggan panganan, las situtu ma rohanami mangida hina denggan ni roha ni boru ni sitoga simanullang on, jala tepatma jam 16.00 Wib (04.00) botarina, siubeon petutu nunga mangido, laos mangan ma hami naniutusi.Dung sidung marsipanganon marhata sigabe-gabe ma hami dijabu ni boruttai si badanding tuai, dung sidung namarhata sigabe-bagi laos marhehe nauli mahami manuju tu huta bangunan tu jabu ni amanta St. Albinus Simanullang, laos disima hami paittehon, paitte dapot tikkina nanaeng laho tu jabu ni amanta Datu (tukang Bosi) songon naung hinataon dapotma tutu tingkina hira-hira jam 20.00 Wib (8.00) borngin, borhat mahami manuju huta siandarsi tu jabu ni amanta Datu (tukang bosi) andorang sosahat dope hami tu jabu ni amanta datu (tukang bosi) on, adong do songon na sungkun-sungkun dibagasan roha nami ala nunga tarbege, hubege hami dibahen pangelek-elek nai ima sitio soara (sarune) hape songon ganti ni jou-jou doi dimaksud amanta Datu (tukang bosi) on, tung sude do tahe didatui amanta nalaguon. Dung sahat hami tu jabu ni amanta datu on hubereng hami ma tingkii hurang lobi 40 (opat pulu) halah pangituai, jala mulai ma masi sungkunon antara ni pangitua – pangituai, tung sada pe ndang adong na asing pandapotna, dungi ala so adong na asing pandapot ni angka pangitua-pangitui, naso adong na bertentangan di na binoto na sida be tu partording ni anak ni omputta Sitoga Simanullangi, laos sahata saoloan ma na pungui mambahen parnyataan (MANGHATINDANGKON) asa adong muse sogot ihutonon ni angka naparpudi, jala mangido ma pangitua-pangitua on sude asa di bukkuhon (di surat hon) sude riwayat ni pardalanan ni nadi utus ni dongan tubu na tinggal di pangarattoan.

Songonon ma isi ni surat pernyataan (panghatindangkon) ni pangitua-pangitua napungui :

SURAT PERNYATAAN / MANGHATINDAKHON SIAN PANGITUA – PANGITUA DIBAKKARA.
BUKTI – BUKTI PARTANDA ANAK SIAHAAN ANAK NI SITOGA SIMANULLANG

I. Ima lage omas :

Nanilehon ni opputta Raja Sisingamangaraja tu opputta Sitoga Simanullang, jala lage omas on hatopan doi (Pusaka) dipomparan ni Sitoga Simanullang rap nampunasa alai dipasahat Sitoga Simanullang mai dianaknya sihahaan ima TUAN DELIMANG asa ibana manimpan pusakoi, jala sahat tu sadari on pomparan ni TUAN DELIMANG do namanimpan i, ima dijabu ni SIMANORUS SIMANULLANG di Bakkara huta Simangulappe,laos adongdo muse tohonan harajaonta ima goar tohonan sian Raja Sisingamangaraja nanilehon na tu ompu Raja Panguhalan anak sipaidua ni Sitoga Simanullang ima goar : PAMUHARAJA ( SIBUHA – BUHAI )

PESTA NABALGA (HORJA)

1. Molo masa ulaon nabalga (Horja) mangallang lombu / horbo dipomparan
na dua ama, ima Pamuharaja dohot Datu Napasang, manjalo jambar
parsihahaan ma pomparan ni Tuan Delimang ima parjarung – jarungna (Somba
– somba)

2. Molo pomparan ni Tuan Delimang marulaon nabalga ( Horja ) mangallang
lombu / horbo mangalehonma Tuan Delimang tu Pamuharaja sada Sasap,
sadanai mai sasap tu Datu Napasang jala parjarungjungna lehonon mai tu
Sinambela Raja Pareme, dungi sasapma tu pomparan ni Sinambela Tuan
Nabolas, jala lehonon ma tu pomparan ni opputta Raja Sisingamangaraja
Somba – somba.

PARADATON PESTA NABALGA (HORJA)

1. Molo masa miahan hoda dipompara ni Tuan Delimang, Parjabu suhatna ma
Sinambela Raja Pareme.

2. Molo masa miahan hoda dipomparan ni Pamuha Raja, Parjabu suhatna ma
Sinambela Tuan Nabolas.

3. Molo masa miahan hoda dipomparan ni Datu Napasang, Parjabu suhatna ma
Pomparan ni Sisingamangaraja.

= Molo adong ulaon nabalga di Tuan Delimanag (Horja) mangalehon Bota –bota
ma Sinambale Raja Pareme tu Tuan Delimang, jala manjalo Tampurung ma
Sinambela Raja Pareme, sian Tuan Delimanag.

= Molo adong Ulaon nabalga di Pamuharaja (horja) mangalehon bota – bota ma
Sinambela Tuan Nabolas, jala manjalo Tampurung ma sian Pamuharaja.

= Molo adong ulaon nabalga di Datu Napasang (horja) mangalahon bota –
bota ma pomparanni Sisingamangaraja, jala manjalo tampurung ma Sian Datu
Napasang.

= Molo adong ulaon nabalga (horja) disi onom ompu na dibakkara, anak
sihahaan ma mangalusi parjolo, jala toluma jambar tohonan jaloon ni si
Toga Simanullang.

Ima partording ni parjambaran jaloon ni Sitoga Simanullang.

Hami Pangitua – pangitua sian Pomparan Sitoga Simanullang natinggal dibona Pasogit (Bakkara) patorangkon songon natar surat diginjang on.

Bakkara, 27 Mei 1963

1. KRISTIAN SIMANULLANG ttd
2. BENJAMIN SIMANULLANG ttd
3. LUDIN SIMANULLANG ttd
4. MULA SIMANULLANG ttd
5. POHAN SIMANULLANG ttd
6. MORHAN SIMANULLANG ttd
7. P. SIMANULLANG ttd
8. TORUS SIMANULLANG ttd
9. DERMAN SIMANULLANG ttd
10. ST. ALBINUS SIMANULLANG ttd

Dung sidung ditanda tangani angka pangitua - pangitua surat pernyataan / manghatindakhon, songon natar surat diginjang marhata horas – horasma hami napungu i, jadi roma sahalak Pangitua sian napungui pasahathon tonani inatta soripada namandok songonon “Ndang manjou pamangan, hape manjou do partondion, jala masitatapan do dolok alai indang boi masi pajonohan, hape ia jolma ndang masiberengan dapot do masibotoon“ Dibege inatta soripada dohamu dongan tubu nami naro tu bona ni turetta on, ia tonani inanta soripada, jala sian sada niroha ni inanta soripada manang napiga nasida, mangido langka nihamu dongan tubu, siatma nian pangidoan ni inanta soripadai, naingkon tinggal hamu jolo dibona ni turetta on 2 manang 3 ari nai, songonima tonani angka inattai, jala pandok ni amatta natua – tua on ndang sialusan muna hataon, ia sotu inanta soripa. Alus nami, hami naniutusi “Mauleate” laos pinatorangma niat nami andorang sosahat dope hami tubonani turetta, molo dung dapot nani jalahan jala tarida nahulului hami, hami naniutus naingkon rap rodo hami mangalusi tona niakka inatta soripada nalambok malilui, ia inatta pe dipangrattoan (Medan) nunga sai tarpaima – ima di hamumulak nami sian tano,Bakkara on. Jadi rap mambahen tangiangma hita tu opputta mulajadin naboloni, asa sai dilehon nian dalan ni ngolu – ngolu dohot paccarian diganup hita on sasudena, asa saut nasinakkap ni rohatta i, jala dapot ma nasada songon dai niaek nang mardua songon dai ni tuak :

* Sihikkit sinalenggam - didolok ni siguling ari
Songon diama nadumenggan - ima rap tapareahi.

* Tus – tus Raja padoha – jala tulusma nasinakkap nirohatta be

* Napuran tano-tano, rangging masiranggongan
Badantai pe padao-dao tondittai ma masigonggoman

* Tubu sakkar dihobuk – hobuk, bolus – boluson ni paronan
Sai tutuma anak namarsangap martua jala siboan hasittongan

* Sahat – sahat nisolu, sahatma tubottean
Lelengmahita mangolu, jala sahat tupanggabean

Huta Siandarsi ari : 27 Mei 1963
Jam : 01.00 Wib (manogot)

Marhehe nauli mahami napungui (bubar) hami naniutus ipe mulakma tuhuta bangunan manogot i, jala marsadiama nanaeng mulak tu medan, mulak manogotna tupangarattoan (Medan)Huta Bangun : 28 Mei 1963, jam 01.30 manogotna borhatma manuju tu medan, jala sahatma tu medan jam 16.00 (04.00) botarina.

Namanusun Catatan On :
Ttd

SYARIF SIMANULLANG

Monding di ari Senin tanggal 28 September 1992 sekira pukul 11.55 Wib di huta Pakkat Desa Cinta Damai Kec. Percut Sei Tuan Kab.Deli Serdang.---------------

Disalin disesuaikan dengan aslinya di bulan Juni 2004 oleh Ramadhana Manullang (Tuan Dilimang) Alamat Jalan Eka Prima No. 07 Kel. Gedung Johor Kec. Medan Johor Kota Medan.Telp. 061 – 68733110, Hp.0812.6542.6894.------------------------

Dapot Silaban/Nurmawati Br.Manullang.Di Ciracas Jakara Timur.Telp.081310620726

Tidak ada komentar: